Egla Xhemali – E premtja është një ditë e rëndësishme për të gjithë publikun që e do artin. Gjithçka është gati. Sot starton festivali gjigant “Ballkanika Folk Festival”, që vjen për herë të parë në Shqipëri. Produksioni i Sokol Gugës në të cilin do marrin pjesë njëmbëdhjetë shtete që do jenë përballë me njëri-tjetrin vjen për herë të parë në disiplinën e valles tradicionale. Pjesëmarrësit kanë mbërritur dhe janë gati për t’u sfiduar nga shtetet e tjera për dy net.
Energjia e festivalit ndihet kudo. Grupet dhuruan emocione që prekën qiejt me performancën në qendër të Tiranës, duke bërë kështu që të kthehen të gjithë ata që ishin duke kaluar rrugës, po dhe kushdo që pati interes për ta, u afrua për t’i ndjekur. Festivali që do të drejtohet nga Klaus Bardeli dhe Ida Nurçe është konceptuar që të jetë një garë ku do të votohet nga një juri profesioniste ballkanase, që do të thotë që secili shtet do të sjellë një përfaqësues të vetin në jurinë e festivalit, ku nuk ka të drejtë të votojë për vendin e tij. Votimi do të bëhet elektronikisht, kështu që secili grup do të votojë në mënyrë elektronike ‘live’ në sallë, pa pasur të drejtën që të votojë për vendin e tij.
Grupet do të konkurrojnë për pesë çmime, ku më i madhi prej tyre i përzgjedhur nga organizatorët do të jetë “Çmimi i Lahutës së Artë”, që është simboli ballkanas më i vjetër dhe katër çmime të tjera speciale “Lahuta e Argjendtë”, “Veshja më e mirë dhe origjinale”, “Kërcimtarja/i më i mirë” dhe “Çmimi i produksionit”. Çmimi i parë do vendoset ‘live’ nga juria në mënyrë elektronike. Por, surprizat nuk kanë të ndalur. Përpos njëmbëdhjetë shteteve që do të vijnë në Shqipëri, produksioni ka menduar që të jenë pjesë e këtij festivali edhe dy grupe të ftuarish, ansambli “Kolo” që vjen nga Bielsko-Biala në Poloni dhe ansambli arbëresh “Shqiponjat” që vjen nga Italia.
Natyrisht që nuk do të mungojnë edhe të ftuarit specialë nga Shqipëria, por jo të gjitha do të zbulohen. Nuk do të mungojë as ansambli mirditor, që do të luajë për kënaqësinë e të gjithë të pranishmëve. Do të ketë muzikë me çifteli, meqë edhe jemi në vitin e Skënderbeut. Këto kohë është punuar fort që gjithçka të jetë e kuruar deri në detaje. Emocionet e natës së parë të konkurrentëve do i zbehë skena. Nuk do e ekzagjeronim nëse do thoshim që ky superfestival do ngelet gjatë në histori, pasi përkon edhe me vitin e Skënderbeut dhe se çdo gjë është mirëmenduar për t’i qëndruar me fanatizëm traditës, duke na bërë krenarë.
